اول يوم كتابه

صحيت من نومى فجأه (دى مش اغنيه عبدالباسط حموده)

لقيت الناس كلها بقت عندها مدونه وبتكتب ومثقفه

قلت والله عال الست سوزان خلت البلد تمام

ومشروع القراءة للجميع نجح

بس هو اسمه القراءة للجميع مش الكتابه ؟

 المهم قلت طب هما احسن منى فى ايه طب ما اعمل انا كمان واحده

واللى ساعدنى ع كده انها ببلاش وانا كمواطن مصرى بمشى ع مقوله

ابو بلاش كتر منه فعملت الممدونه دى

وانا والا اعرف فيها حاجه ولا متخيل نفسى العقاد ولا طه حسين

بس قلت لا لازم اتغير واتطور واخد اول القابى فى الحياه البغيضه

لقب ( مدون ) اه لقب مدون اصل المدونين دلوقتى واخدين سيط وشهره عنب

تصحى من نومك فجاه بردوا تلاقى القبض ع المدون فلان الفلانى

ومدونته البطيخه الحمراء تنفع فى اليوم الاقرع

لذلك قرت اعمل البتاعه دى

يمكن اتقفش فى مره وانا بسب ( جمال ) الطبيعه الحلوه دى

ولا بكره العيد ( المبارك ) اللى مش عارف اشترى بنطلون جديد فيه

واهو احقق احد احلامى قبل سن الثلاثين زى اعلان بيبسى ده

واشطب على كلمه اصبح من المشاهير

ياترى ممكن ؟