أدهم صبرى وطائر النهضة

أدهم صبرى ضابط مخابرات مصرى جامد، داخل ع الستين من عمره، يرمز له بالرمز ب-516 ، حرف الباء يعنى أنه من بولاق، أما الرقم 516 فده رقم الأتوبيس اللى بيركبه عشان يوصل محطة البحوث ومنها يوصل لرمسيس يغير المترو عشان ينزل محطة القبة بتاعة المخابرات.
هذا لأن أدهم رجل من نوع خاص حيث أنه يجيد قيادة كل أنواع المواصلات من الطائرات والغواصات والسوبرجيت حتى التوك توك،ويجيد استخدام جميع أنواع الأسلحة من المسدس وبمب العيد حتى القنابل النووية والهيدروجينية، ويجيد 66 لغة بالصلا ع النبى وفيه لغتين اتعلمهم وهوه نايم،
ويجيد جميع أنواع التنكر، وجميع أنواع القتال والألعاب من التايكوندو وحتى عريس وعروسة
لقد أجمع الكل ومنهم أنا أنه من المستحيل وربنا أن يجيد رجل واحد فى عمر جدى كل هذه المهارات ولذلك استحق هذا اللقب .. رجل المستحيل
**************************************************************
ليلة ليلاء :
عاد الرئيس محمد منسى الى منزله بعد يوم عاصف من الاجتماعات و التحركات و ما ان ارتدى  ملابس النوم حتى قام بمكالمة مدير مكتبه، الرئيس :
كله تمام عندك يا دقاق؟
الدقاق : كله جاهز ليوم غد سيدى لا تقلق
الرئيس : طيب نبه على السواق يجيلى بكرة 8 الصبح
الدقاق : نبهت يا ريس عليه و حفكره دلوقتى تانى
الرئيس : طيب يا دقاق شكرا … مع السلامة
الدقاق : مع السلامة
وبعد أن أغلق السماعة … نظر إلى الغرفة … وكان ما رآه مذهلاً … مذهلاً بحق … فقد كانت الغرفة خالية … خالية تماماً
  الشبشب ضاع:
اتسعت حدقتا الرئيس منسى و هو ينظر إلى قفص طائر النهضة خاوياً ولا أثر للطائر على الإطلاق.
" ذهب الطائر !!! من يجرؤ على اقتحام بيت الرئيس بل و سرقته"، صاح منسى منفعلا
لابد من تصرف سريع ما العمل ؟! ، ثم قرر الرئيس منسى الاتصال برجل “الجماعة” القوى حشمت الواصل
منسى : حشمت الحقنى طائر النهضة اتسرق والقفص فاضى ، ديه مصيبة والموضوع كله كدة حيبوظ و مش حعرف انفذ البرنامج
حشمت: امتى اخر مرة شوفته ؟
منسى: من ساعتين قبل اجتماعى مع رئيس الوزراء
حشمت : إذاً لم يتم سرقته من فترة  طويلة ، اطمئن سيدى الرئيس أنا أعرف الرجل المناسب الذى سوف يساعدنا
منسى: طيب انا حاعتمد عليك فى الموضوع ده
حشمت : لا تقلق اعتبره محلول ، يلا تصبح على خير
منسى : و انت من أهله و عشيرته

يوم غير عادى:
أشرقت شمس القاهرة ساطعة علي غير المعتاد في هذا الوقت من العام عندما ظهرت سيارة ألمانية الصنع تنم طريقة قيادتها عن معرفة مسبقة بالمدينة.
بداخلها كان أدهم متوجهاً إلى مبنى المخابرات العامة … وما أن وصل حتى صعد درج المبنى مهرولاً حتى يستطيع اللحاق بدفتر الحضور .
فوجئ أدهم اثناء طابور اللياقة الصباحى بالمدير يستدعيه على وجه السرعة فذهب و طرق على بابه.
المدير : اجلس يا أدهم لدى مهمة خاصة و صعبة ولا يستطيع غيرك القيام بها ، للتو أبلغنى حشمت الواصل أنه تمت سرقة طائر النهضة من منزل الرئيس بين الساعة التاسعة والحادية عشر ليلا من مساء امس.
عقد أدهم حاجبيه حتى لم يستطيع فكهما قائلا : ماذا!! هل اهترأ الوضع الى هذا الحد!
عقد المدير حاجبيه هو الاخر وقال : انت مش قاعد معانا ولا إيه يا أدهم!!
أدهم : آسف سيدى و لكن هول الصدمة أوقف عقلى، ثم سيدى ما صفة حشمت للاتصال بنا؟
المدير : أدهم جرى إيه ما تاكل عيش وانت ساكت!
أدهم : آسف سيدى ، هل من شكوك أو آثار وجدت فى مكان الحادث؟
المدير : فقط بصمات مطموسة بآثار فطير مشلتت من مشلتت البحيرة ولكن لم يستدل على صاحبها، العبء الاكبر يقع على كتفك فى هذه المهمة.
أدهم : سأبذل قصارى جهدى سيدى ولن يهدأ لى بال قبل العثور على طائر النهضة.
المدير : مصر أمانة فى رقبتك يا رأفت قصدى يا أدهم

واحدة سجق و واحدة سكر
ترجل أدهم من سيارته بجانب محل الفطير المشلتت وما أن دنا منه حتى أبرز تحقيق شخصيته قائلا:
أدهم صبرى مخابرات عامة
العامل : أؤمر يا بيه فيه حاجة عملتها غلط احنا غلابة والله
أدهم : اتطمن انا جاى اعرف منك بس هل خلال الايام اللى فاتت حصل معاك موقف غريب
العامل : أه يا بيه امبارح فيه واحد اخد فطيرة و جرى بيها مادفعش فلوس ماتعرفش تجيبه او تجيب الفلوس يسعدك ربنا
أدهم : احنا حنهزر يا راجل انت بتكلم عن حد شكله غريب لكنته غريبه كدة
العامل : ايوة يا بيه أول امبارح جيه اتنين شكلهم غريب كدة و طلبوا فطيرة سجق و فطيرة سكر مع ان البلد كلها عارفة انه محل مشلتت بس اشتروا فى الآخر و مشوا
أدهم: ماسمعتهمش بيقولوا حاجة كدة ولا كدة
العامل: سمعتهم بيقولوا فى وسط الكلام طيارة و سيبيريا … ألّا هى ايه سيبيريا ديه يا بيه نوع سبيط ؟
أدهم : سبيط ! على العموم شكرا

 سيبريا
في مطار سيبريا .. نزل أدهم و هو متنكر في شكل امرأة حامل في شهرها السابع .. تحت اسم أميرة صواف ، و ما أن أنهى اجراءات الجوازات حتى فوجئ بضربة مباغتة  … مباغتة جداً … جداً!
أفاق أدهم ليجد نفسه مكبلاً بالقيود وأمامه مفاجأة مذهلة بحق .. المسئولين عن خطف طائر النهضة! كان يقف أمامه المستشارة زكية زكريا والمستشار مرتضى مشهور يتبادلون أطراف الحديث مع سيرجى كربوف. استدارات زكية زكريا ببطء لتواجه أدهم قائلة: صحيت بسرعة يعنى، شكلك جامد ياد.
أجابها أدهم بغضب : ليه عملتى كدة ليه؟
قالت ببرود: أريد إفشال منسى فقررت أخذ تميمته، وتطابقت مصالحنا مع الدب الروسى لوقف الدعم لسوريا و قام سيرجى بتنفيذ العملية على أتم وجه.
قاطعها مرتضى قائلا : وانت كالعادة داخل مستخدم نفس الحروف فى اسمك فكان الموضوع سهل.
رد أدهم : وانت عمرك ماطلع منك حاجة عدلة مش مستغرب منك
قاطعه مرتضى : ماشفتش حاجة حلوة ايه ما انا اللى جبت عمرو زكى!!
باغت أدهم الجميع فكان أثناء حديثه معهم قد فك قيوده * عادى بيعملها كل مرة راجع كل القصص السابقة* وقام منقضا على قفص طائر النهضة فصرخت زكية : سيرجى الحقققق
هب سيرجى قائلا : لن تنجو من قبضتى أبدا
اقترب منه أدهم و قام لازقه حتة كف على وشه
فانتفض سيرجى غاضبا و استدعى كل رجاله
وفجأة وجد أدهم نفسه محاطاً بثلاثمائة دبابة وعشر طائرات هليكوبتر حربية
كل منها مزود بوحدة صواريخ كاملة وعشرة آلاف مقاتل من القوات الخاصة
  إنه يومٌ لن ينساه التاريخ فقد كانت كتيبة الإعدام تلتف حول أدهم فى أصعب مواجهة رآها فى حياته كلها
والأعصاب مشدودة والجو كله قد تكهرب وتكاد السماء ترسل صواعقها والبرق والرعد بدورهما
والرياح تهوى والمطر يهطل بغزارة حتى كادت كل هذه الأجواء أن تعصف بهم
وبالرغم من كل ذلك وعلى النقيض تماماً فقد ظل أدهم محتفظاً بابتسامته الهادئه مع طقس مشمس ربيعى
قائلا بسخرية: مرحى ..هل كل هذه الحشود من أجلى؟ سأستمتع كثيرا بعد ان أذيقكم طعم الهزيمة
فالتفت اليه سيرجى بحركه حادة قائلا : أى أحمق أنت؟ ألا ترى كتيبة الاعدام هذه والمؤلفة من حشود تشتمل على
أفضل جنود فى العالم باتحاد جميع الدول ولو تحركت ذبابة دون أمرى لنفسناها نفسا .. أقصد لنسفناها نسفا.
مط أدهم شفتيه ساخرا وهو يقول: بردو نفس الغلطة اللى بتكرروها فى كل الاعداد ها تقعدوا ترغوا لغايه ما اكون انا خلعت
وانطلق ادهم يعدو مسرعا حتى صرخ سيرجى بهم : لا تدعوه يهرب اقتلوا ذلك الشيطان
 فى الجزء الاول من الثانية دار أدهم حول نفسه لتهوى قبضته على فك أقرب جندى له لتتطاير أسنانه فى الهواء لتخترق إحداهن ذراع جندى آخر وتستقر الثانيه فى رأس جندى ثالث جحظت عيناه.
وفى الجزء الثانى من الثانية : راحت قبضة أدهم تحصد العشرات حتى بدا وكأنه آلة صممت خصيصا للقتل.
وفى الجزء الثالث من الثانية : راحت نظرات أدهم القاتلة ترمق الجنود بلا هوادة ليفقد الوعى فوراً كل من يقابل نظرات أدهم القاتلة.
وفى الجزء الرابع من الثانية : كان أدهم ينهى اجراءت سفره فى المطار عائداً لمصر.

 يا فرحة ما تمت
عاد أدهم فخوراً الى أرض الوطن بعد أن أدى مهمته بنجاح
و استقل تاكسى مباشرة من المطار إلى قصر الرئاسة حيث استقبله الرئيس منسى بترحاب شديد قائلاً: أحسنت يا إبنى أداء مبهر ومشرف.
رد أدهم : سيدى أنا فقط اؤدى واجبى.
الرئيس : أين  طائر النهضة أريد أن أعيده إلى مكانه بنفسى
ناوله أدهم الطائر فى قفصه و هنا كانت المفاجأة المبهرة … المبهرة جدا … جدا
 قال الرئيس غاضبا : هذا ليس طائر النهضة هذا طائر آخر ماهذا!!!!
رد أدهم : سيدى هذا هو الطائر الذى كان بحوزة المختطفين
سرح الرئيس بخياله متذكراً مواصفات طائر النهضة قائلاً: يا إبنى طائر النهضة
له رأس و قيادة .. وله أجنحة و له جسد يغطيه ريش
وله مؤخــرة كالزعـانف !
ثم التفت الى أدهم قائلاً : هل استوعبت؟
فوجد أدهم يغط فى سبات عميق … عميق جدا … جدا

 فى العدد القادم
هل يستطيع أدهم دخول إسرائيل رغم لجنة التفتيش اللي موجودة علي الباب؟
ما هى العلاقة بين محطة ترام الشبان المسلمين و الجماعة؟

الرد على بعض الاتهامات الخاطئة بخصوص الاضراب والعصيان المدنى

الإتهام الأول: يقول البعض أن الإضراب و الإمتناع عن سداج الفواتير سيؤدي إلي عدم دفع الرواتب حيث أنه لا يوجد دخل للمؤسسة أو الشركة

الرد : أعتي و أطول العصيانات المدنية كان في بولندا عام 1989 ضد الحكم العسكري و إستمر فقط 11 يوم و هو العصيان الأطول في التاريخ ضد أكثر الأنظمة ديكتاتورية….و هذا يوضح أنه لا حكومة في العالم تستطيع تحمل العصيان المدني أكثر من أسبوع و أكثر بقليل …و لن يستمر بأي حال من الأحوال إلي شهر أو يؤدي إلي عدم دفع للرواتب…كما إن الثورة المصرية إستمرت 18 يوم كان أكثر نصف الك المده في حالة كساد تجاري كبير و مع ذلك لم يؤدي الأمر إلي الإمتناع عن دفع الرواتب
لذا فهذه الحجة هي غالبا حجة معشر أعداء الثورة الذين أصلا كانوا يرون أن الثورة خرابا…فأمتنع عن نقاش أي شخص منهم

الإتهام الثاني : لو إنت شغال في قطاع خاص مش حتلاقي مواصلات تروح بيها الشغل

الرد: حدث في مصر في الأونة الأخيرة بعد الثورة العديد من الإضرابات العمالية و الإعتصامات أشهرها إضراب عمال النقل العام عن الأتوبيسات الذي إمتد في جميع أنحاء الجمهورية و تبعه توقف تام في حركة أتوبيسات النقل العام التي تعد من أهم وسائل النقل في مصر…لذلك فهي لن تكون أول مرة تتوقف فيها المواصلات و لكنها هذه المرة للصالح العام
كما إنه لو مفيش مواصلات تروح بيها شغلك في القطاع الخاص فهذا لا ينطبق علي شخص واحد فقط بل علي جميع العاملين معاك في الشركة و لن يستطيع أبدا المدير خصم أو فصل جميع العاملين بالشركة بالإضافة أنه حيكون مش بإيدهم

الإتهام الثالث :لو إنت شغال باليومية مش حتعرف تروح شغلك

الرد: قلناها مئات المرات العصيان المدني هو الإمتناع عن العمل أو أي وسيلة إتصال مع الشركات الحكومية و ليست الخاصة أو الأعمال الخاصة و الحرفية…لذلك أصحاب اليوميات سيكونوا أقل فئة تأثرا بهذا العصيان….في الواقع سيكونون هم الفئة الوحيدة في هذا الوقت التي تجني مالا

الإتهام الرابع : لو مريض مش حتلاقي مستشفي أو دكتور و لو عاوز دواء مش حتلاقي صيدلية

الرد: إنت بقي كمل كلامه و قول له لو في حريقة مش حتلاقي مطافي …..ثم رد عليه أنه للمرة المليون نقولها العصيان المدني لا يشمل الوظائف الحرجة الضرورية مثل الأطباء و المستشفيات و الصيدليات و الإسعاف و المطافي

الإتهام الخامس : لو مش معاك فلوس مش حتعرف تسحب فلوس من البنك علشات قافل

الرد: غالبا صاحب الحجة دي مش عايش أصلا في مصر ولا عارف حالنا عامل إزاي…قول له إن نسبة المصريين اللي معاهم فلوس في البنك و بيسحبوا منها أقل من 5% ….ده أصلا
أكثر من 60% من المصريين عمرهم ما دخلوا بنك…إتهام ساذج للطبقة العليا المرفهة في مصر و التي لا تريد أن تشقي يومين لصالح البلد الإتهام السادس :لو مدفعناش الفواتير حيقطعوا علينا الميان و الكهرباء و الغاز
:

الرد : ليس من حق السلطات والمؤسسات أن تقطع تلك الخدمات عن المواطنين بشكل جماعي سواء كأحياء أو مدن أو غير ذلك فهو غير قانوني تماكا مثل عدم قانونية قطع الإتصلات أيام الثورة ….و حتي لو فعلوها فلنجرب حياة الكثير من المصريين حيث أنه من المعلوم أن الكثير و الكثير من القري المصرية مش واصلها مياه نضيفة أو كهرباء علشان تتقطع أصلا

يا جماعة .. الناس اللي معتقدة إن العصيان المدني هيؤذي البلد … أيوه هيؤذيها طبعا …. بس انتوا باصين تحت رجليكم … الثورة أذت مصر في التمنتاشر يوم اللي اتعملت فيها… البورصة وقفت … والاسعار زادت … و كان فيه أعمل بلطجة و سرقة …. بس بعد كده زادت صادرات مصر %17 و زادت مكاسب قناة السويس %25 والبورصة بتكسب… بس كل مانبتدي نهدى ونبني نلاقي المجلس العسكري بيقتل في اخواتنا….. و بيدوس عليهم لو مش بالمدرعة يبقى بالجزمة …. و بيعريهم لو مش من الهدوم يبقى من الحقوق الإنسانية …. احنا هنؤذي مصر … بس عشان تبقى أحسن … زي ماعشان صحتك تبقى كويسة … بتتعب نفسك وبتنزل تجري وجسمك يوجعك …. أو لما بتحبي تخسي بتعملي ريجيم و بتحرمي نفسك من الكل اللي بتحبيه … ما ده أذى نفسي … يوم أو يومين أو تلاتة وهنوصل لالاحنا عايزينه …. و لو موافقش يمشي … هنستحمل الجوع والفقر بس مش هنسكت تاني ومش هنغمض عنينا عن الظلم عشان لقمة العيش … الجيل الأكبر مننا عمل كده … و قعد 30 سنة ذليل … إذا كنت ترضى تتذل عشان تاكل … يبقى ده عصرك السعيد

لو إحنا حنضر البورصة أسبوع لكن بعد كده حننفعها نفع رهيب….يبقي أحسن من الوضع اللي احنا فيه لأن طريقة إدارة المجلس العسكري للبلاد و عدم وجود أمن أو إستقرار و سقوط شهداء يوميا و أعمال البلطجة و السرقة تدمر البورصة المصرية علي مدار سنة كاملة…يعني إحنا جنكون أحن علي البلد من المجلس العسكري

ثورة 25 يناير بتاعة رومانيا !

من 22 سنه كان فى ديكتاتور فى رومانيا أسمه شاوشيسكو "مبارك بتاع رومانيا" الناس قامت ضده فى مظاهرات مليونيه فى بلد عدده حوالى 25 مليون مش 80 مليون زى ناس !!!!

كل الناس فى رومانيا أتوحدت ضده والكل شارك بعد حالة الإحتقان و الفقر و برده بعد دول أوروبا الشرقيه الى جنبهم ما إتحررت من الشيوعيه فى وقت واحد زى الموجه و إبتدت الموجه من بلد واحده "تونس بتاعة أوروبا الشرقيه" وإمتدت لباقى الدول "ليبيا و اليمن و الأردن و سوريا بتوع أوروبا الشرقيه" .

الى شارك فى الثوره كل الرومانيين 6 إبريل بتوع رومانيا كفاية بتاعة رومانيا كلنا خالد سعيد بتاع رومانيا و حتى الإخوان بتوع رومانيا و لم يشارك الشيوعيون " السلفيين بتوع رومانيا" لأنهم رأوا أن الخروج على الحاكم الرفيق شاوشيسكو حرام حسب المنهج الشيوعى .

و أطلقت الشراره من حادث بسيط فى مدينة تيميشوارا "السويس بتاعة رومانيا" فقد كان خلاف بسيط حدث بين مجموعة من رعية قس في مدينة تيميشوارا الذي واجه خطر إخلاء بيته بالقوة من قبل سلطات الأمن ، كان ذلك كافيا بحد ذاته لإشعال لهيب الثورة . حيث تضامن سائر سكان المدينة مع جرأة وشجاعة تلك الرعية وتجمعوا بأعداد كبيرة في ساحتها المركزية . ولكن التطورات التي تلت لم تكن لها أية صلة بالقس ومسألة إخلائه لمنزله.

و قامت المظاهرات المليونيه فى كل بوخارست " القاهره بتاعة رومانيا" و تصدى لها الأمن و قتل حوالى 4000 إلاف شهيد وقامت الجماهير بمحاصرة القصر. عندما لم يجد معاونو شاوشيسكو من الجيش طريق إخر للفرار قاموا بدور بطولى و هو أن قيدوا شاوشيسكو هو و زوجته و قاموا بقتله هو و زوجته بعد محاكمه صوريه إستغرقت دقائق و ظهروا أمام الجماهير أنهم أبطال و الجيش و الشعب إيد واحده.

بعدها ظهر الشعراوى بتاع رومانيا على التليفزيون و قالهم الثائر الحق هو من يهدء بعد ثورته ليبنى الأمجاد و ظهر مجموعه من المنافقين فى التليفزيون الرومانى ليقولوا فى برامج التوك شو بتاعة رومانيا إن مافيش حاجه إسمها صورة مضاده و إن الحزب الوطنى بتاع رومانيا إنتهى .و الناس لازم تفكر فى المستقبل و ما تبصش تحت رجليها و دى مرحله إنتهت من تاريخ رومانيا و لازم ننساها مع طبعا شويه أغانى رومانيه للتمجيد فى الثوره الرومانيه و الترحم على الشهدا زى حماده هلال الرومانى و تامر حسنى الرومانى و غيرهم.

طبعا الناس صدقت الأغانى و منظر الملايين الى فلى الشوارع خلاهم متأكدين و مطمئنين إن أى واحد هيجى بعد شاوشيسكو"مبارك بتاع رومانيا" لازم هيمشى على عجين ميلخبطوش و إلا هو عارف إيه الى هيحصله مع العلم إن أيامها مكانش فيه لسه فضائيات و لا نت و لا فيس بوك و لا موبايلات.

و طبعا الحزب الوطنى بتاع رومانيا طهر نفسه من القيادات المشهوره الفاسده ودخل الإنتخابات بالصف الثانى الى مش مشهورين قصاد أحزاب المعارضه الضعيفه المتفرقه الى عددها هيعدى الخمسميه و سيطر على البرلمان وكله بالديمقراطيه و بعد سنه و نصف تم التنكيل بالمعارضه و تصفيتها جسديا " طبعا دول عارفين نفسهم.........."مش هيحيركم " الإخوان بتوع رومانيا"

و تحولت رومانيا لبلد ديمقراطى لكن أكثر فقرا فيه تداول للسلطه بين مجموعه من الفاسدين زى اليسكو "شفيق بتاع رومانيا" الشعب أنتخبه أول أربع سنين و بعدين ماجددلوش و جاب واحد ثانى و الإنتخابات الى بعدها جاب شفيق ثانى أقصد إليسكو لأنه أحسن الوحشين.

و صارت ثورة رومانيا أضحوكة العالم بعد أن كانت محط أنظار العالم كله و تحولت أنظار العام عين ميدان التحرير بتاع رومانيا و معدش الشعب الرومانى هو الشعب الى ضحى ب 4000 آلاف شهيد عشان الحريه و الديمقراطيه بل هو من ضحى بآلاف الشهداء من أجل قتل شاوشيسكو و المجى بفاسد آخر فهو من أسقط الرئيس و لم يسقط النظام مع العلم بان نسبة التعليم فى رومانيا 100% مش زى حالاتنا نسبة الأميه 40 % ده غير الى بيعرفوا يقروا و يكتبوا بس معندهمش وعى.

"لا شك أن ثورة رومانيا 1989 أعادت الحرية والديموقراطية والكرامة إلى الرومانيين . ورغم ذلك فإن الذين يتذكرون تلك الأحداث بامتنان، قلائل بينما يبدي أغلبهم تجاهها اللامبالاة أو النفور أو يستغلون الفرصة للتطرق إلى أسباب عدم رضاهم الحالي . وهناك أيضا من يعلق عليها بمرارة أو سخرية . حتى ضحايا الثورة والمقدرعددهم ما يربو على الألف نسمة ومعظمهم من الشباب لم يعدوا سببا لطأطأة رأسهم ورعا. وينسب المحللون تلك المواقف إلى خيبةالأمل الكبيرة التي انتابت الرومانيون في السنوات التي أعقبت الثورة وحطمت الآمال الكبارالتي كانوا قد علقوها على الثورة" "موقع إذاعة صوت رومانيا ".

فما بالك بشعب لم يسقط حتى الرئيس بل أن رئيسه مازال حرا طليقا يعيش هو و أسرته مطمئنا فى قصره بأحد المنتجعات.

المباراه لم تنتهى بعد ...... إحنا كسبنا واحد صفر فى الشوط الأول و لسه الشوط الثانى و المشكله إن فى ناس كتير إبتدت تحتفل بالنصر من دلوقتى مع العلم إن أحنا بنلاعب فرقه كبيره بطلة العالم فى الفساد لمدة 30 سنه.

العقل هو معرفة ما سيكون بما قد كان و قد رأينا ما قد كان فلنحدد لأنفسنا ما سيكون
مقال لـ الاستاذ هيكل

الانسان اصله بيضه

 تويتر ونظريات التطور ومبـدأ الانتخاب الطبيعى
اول ما بتعمل الاكونت بتاعك هتلاقى جنب اسمك صورة بيضه  فى اللى بيتعايش معاها وفى اللى بيحب يفقس بسرعة
ويبدا مشواره بتغيير صورته على حسب دماغه وحالته المزاجيه وقت ما فقس وعلى طول تلاقيه بيمسك فى ديل الخلق كلها
ويعمل follow لاى حد يقابله وتترسم الابتسامات على وشه لما يمسك فى ديل واحد فقس من بدرى وظهر له ريش

يتبع...